2025 жылдың 28 қазанында ҚР Президентінің жанындағы Ұлттық ғылым академиясының Білім және қоғамды дамыту ғылымдары орталығының өкілдері ҚР Ғылым және жоғары білім министрлігінің Ғылым комитетіне қарасты Ә.Х. Марғұлан атындағы Археология институтының басшылығымен кездесті.
Кездесуге Археология институтының бас директоры Оңғарұлы Ақан және бас директордың ғылым жөніндегі орынбасары Қасенова Әсемгүл Дәуренқызы қатысты.
Жиын барысында ҚР Президентінің жанындағы Ұлттық ғылым академиясы институтпен Ұлттық құрылтай мен Ғылым және технологиялар жөніндегі ұлттық кеңеске ұсыныстар талқылап, ұлттық бірегейлікті нығайту мәселелері бойынша нақты ұсыныстар нақтыланды. Ұлттық бірегейлік аясында киелі география мен тарихи жадты цифрлық форматта сақтау, «Цифрлық тарихи жад» атты ашық академиялық платформаны әзірлеу бойынша бастамалар ұсынылды.
Сонымен қатар, әлеуметтік-гуманитарлық ғылымдар саласындағы басым бағыттарды айқындау, ғылыми жобаларға ұсыныстар беру және бойынша нақты шаралар жоспарланды.
Институт директоры ғылыми зерттеу жұмыстарының нәтижелерін цифрлық форматқа көшіру және ашық қолжетімді ету жұмыстары туралы және археология саласында ғылыми кадр даярлау – басты міндеттердің бірі екенін атап өтті. Сондай – ақ осы бағытта диссертациялық кеңес құру және жас ғалымдарға қолдау көрсету шаралары қолға алынғандығын жеткізді. Осы айтылған ұсыныстар хаттамаға енгізіліп, олардың негізінде арнайы аналитикалық жазба дайындалып, уәкілетті органға жолданатыны келісілді.
Кездесу соңында Академия өкілдеріне институттың ғылыми-зерттеу базасы мен зертханалары таныстырылып, делегаттар заманауи зерттеу инфрақұрылымымен, ғылыми жобалардың жүзеге асырылу барысымен, сондай-ақ археологиялық материалдарды өңдеу мен сақтау үдерісінің ерекшеліктерімен жан-жақты танысты.
