Академиктердің жалпы жиналысына құрметті академиктер, ғылыми бағыттар бойынша Академия бөлімшелерінің мүшелері, қоғамдық салалық академиялардың, ғылыми бірлестіктердің, қауымдастықтардың басшылары, жетекші ғалымдар мен белсенді жас ғалымдар қатысты.

ҚР Президентінің жанындағы Ұлттық ғылым академиясының биылғы жылғы қызметінің негізгі қорытындылары бойынша Академия президенті, академик Күрішбаев Ақылбек Қажығұлұлы баяндама жасады.

Баяндамада атап өтілгендей: «2025 жылы ҚР Президентінің жанындағы Ұлттық ғылым академиясы ғылымды дамытудың жаңа моделіне көшу үдерісін толық аяқтады. Аталған модель стратегиялық болжауды күшейтуге, ғылыми ресурстарды тиімді шоғырландыруға, сондай-ақ ғылыми зерттеулердің нәтижелерін экономиканың нақты секторына жүйелі түрде енгізуге бағытталған.

Негізгі жетістіктердің бірі - ұлттық форсайт жүйесінің іске қосылуы. Жыл ішінде 70 өңірлік және салалық форсайт-сессия өткізілді, 220 стратегиялық маңызы бар ғылыми міндеттер айқындалып, 65 ғылыми-техникалық тапсырма әзірленді, сондай-ақ 6 өңірлік форсайт орталығы құрылды.

Оңтүстік Кореялық KISTI институтымен бірлесіп құрылған AI SilkNet орталығы базасында ғылым мен технологияларды талдау және болжаудың бірыңғай цифрлық экожүйесін қалыптастыру басталды.

Академия ғылымның басым бағыттарын айқындаудың жаңа моделін енгізіп, бюджеттік ресурстарды стратегиялық салаларға шоғырландыруды, ашықтықты және ғылыми инвестициялардың тиімділігін арттыруды қамтамасыз етті. Ғылыми кадрлар мен инфрақұрылымды дамытуға қатысты бірқатар аналитикалық ұсынымдар уәкілетті мемлекеттік органдарға жолданды.

2025 жылы 4 пилоттық интеграцияланған пәнаралық ғылыми-техникалық бағдарлама әзірленіп, жаңа ғылыми орталықтар мен зертханалар құрылды, Назарбаев Университетімен бірлескен флагмандық бағдарламалар іске асырылуда. Қытай, Германия, Ресей және басқа да елдермен халықаралық ғылыми ынтымақтастық едәуір кеңейді.

Өңірлік ғылымды дамытуға ерекше көңіл бөлінді: Академия Президиумының 10 көшпелі отырысы өткізілді, өңірлік ғылымды дамыту жоспарлары бекітіліп, әкімдіктер жанындағы Кеңестерге методикалық көмек көрсетілді.

Жас ғалымдарды қолдау жүйелі түрде жалғасты: II Халықаралық жас ғалымдар конгресі (1000-нан астам қатысушы, 26 елден 80-нен аса жас ғалымдар) өткізілді, «Ғылым және ғылыми-технологиялық саясат туралы» Заңға түзетулер әзірленді, алғаш рет Жас зерттеушілер академиясы құрылды.

2025 жылғы Ұлттық ғылым академиясының қызметі отандық ғылымның орнықты дамуына, оның экономикаға қосатын үлесін арттыруға және Қазақстанның ғылыми егемендігін нығайтуға берік институционалдық әрі аналитикалық негіз қалады».

Кеңейтілген жалпы жиналыста ҚР ҰҒА Өмір және денсаулық ғылымдары бөлімшесінің төрағасы, академик Вячеслав Нотанович Локшин, Агробиоресурстар және экология ғылымдары бөлімшесінің төрағасы, академик Туруспеков Ерлан Кеңесбекұлы баяндама жасап, өз бөлімшелері бойынша 2025 жылы атқарылған негізгі жұмыстарға тоқталып өтті.

Сондай-ақ, ҚР Ұлттық ғылым академиясының негізгі стратегиялық серіктестерінің бірі Ресей ғылым академиясы президентінің орынбасары Петр Александрович Чекмарёв бейне баяндама жасап, қос академия арасындағы әріптестік туралы, қысқа уақыттағы ортақ атқарылған жұмыстар туралы, атап айтқанда көміртекті егіншілікті дамытуда Қазақстанда алғаш құрылған карбонды полигон, агроөнеркәсіптік кешен саласындағы ЭКСПО көрмесі, Алматы облысында ашылған Мичурин бағы туралы айтып өтті.

Сонымен қатар, жалпы жиналыс соңына қарай жиынға қатысқан елімізге танымал ғалымдар, құрметті академиктер мен жас ғалымдар Академияның ағымдағы жылға атқарылған жұмыстарына жоғары баға беріп, отандық ғылымды дамытудағы ұсынылған жаңа моделді, ғылымның басым бағыттарын форсайттық зерттеулер арқылы анықтауды толықтай қолдап, өз тараптарынан нақты ұсыныстарын жеткізіп, пікірлерін білдірді.

Жаңалықтар

ҚР ПРЕЗИДЕНТІНІҢ ЖАНЫНДАҒЫ ҰЛТТЫҚ ҒЫЛЫМ АКАДЕМИЯСЫНЫҢ 2025 ЖЫЛҒЫ ҚЫЗМЕТІНІҢ ҚОРЫТЫНДЫЛАРЫ БОЙЫНША АКАДЕМИКТЕРДІҢ КЕҢЕЙТІЛГЕН ЖАЛПЫ ЖИНАЛЫСЫ ӨТКІЗІЛДІ