Құрметті Қасым-Жомарт Кемелұлы!

Қазақстан Республикасы Президентінің жанындағы Ұлттық ғылым Академиясының академиктері Сізді алдымызда келе жатқан Жаңа 2026 жылмен шын жүректен құттықтайды!

Біздің еліміз үшін өтіп бара жатқан 2025 жыл табысты жыл болды. Өзіңіздің жүргізіп отырған көреген саясатыңыздың арқасында еліміздің әлеуметтік-экономикалық дамуы жаңа сапалық деңгейге көтерілді.

Әсіресе, халықаралық аренада Қазақстан елеулі жетістіктерге қол жеткізіп, мемлекетіміздің әлемдік деңгейдегі беделі одан әрі арта түсті. Бүгінде еліміз бүкіл әлемге саяси ұстанымы жоғары, Орта Азиядағы көшбасшы мемлекет ретінде кеңінен танымал болып отырғаны өмір шындығы.

Өткен жыл отандық ғылым саласы үшін де табысты болды. Еліміздің қарқынды дамуына тек қана ғылым арқылы қол жеткізуге болатындығы туралы Сіздің стратегиялық көзқарасыңыз ғылыми қауымдастыққа жаңа серпіліс берді. Өзіңіздің тікелей қолдауыңыздың нәтижесінде ғылымды мемлекеттік қаржыландыру көлемі еселеп өсіп, ғалымдардың өнімді жұмыс істеуіне тиісті жағдай туғызу мәселелері шешіле бастады.

Сонымен қатар, Өзіңіздің бастамаңызбен жаңадан құрылған Ұлттық ғылым академиясы үшін де 2025 жыл нәтижелі жыл болды. Академияның институционалдық тұрғыда қалыптасуы аяқталып, ол отандық ғылымды дамытудың жаңа заманауи жүйесін құруға бағытталған игі істерді қолға алып, тың бастамаларын іске асыруға кірісті.

Бүгінгі қол жеткен жетістіктер ертеңгі күннің қарқынды дамуының негізін қалайтыны белгілі. Осыған орай, алдымыздағы 2026 жыл Сіздің басшылығыңызбен елімізді жаңа биік белестерге, ұлы жеңістерге апаратын жыл болатынына сеніміміз мол!

Келе жатқан Жаңа 2026 жыл егемен елімізге, әрбір отбасыға құт-береке жылы болсын! Сізге зор денсаулық, жанұяңызға амандық, еліңіз үшін жасап жатқан қажырлы еңбегіңізге толағай табыс тілейміз!

Құрметпен, академиктер:

А. Күрішбаев

А. Жұмаділдаев

Ю. Пя

С. Ақшолақов

Ж. Таймағамбетов

А. Қалтаев

В. Локшин

Д. Қайдарова

Э. Батырбеков

Т. Рамазанов

Е. Тұрыспеков

Б. Телтаев

М. Орынбаев

Ж. Бакенов

Д. Біләлов

М. Здоровец

Д. Сұраған

Жаңалықтар

ҰЛТТЫҚ ҒЫЛЫМ АКАДЕМИЯСЫНЫҢ АКАДЕМИКТЕРІ МЕМЛЕКЕТ БАСШЫСЫН ЖАҢА 2026 ЖЫЛМЕН ҚҰТТЫҚТАП, ЕЛІМІЗДІҢ ДАМУЫНА ҚАТЫСТЫ ІЗГІ ТІЛЕКТЕРІН БІЛДІРДІ.