2026 жылғы 10 ақпанда Қазақстан Республикасы Президентінің жанындағы Қазақстан Республикасының Ұлттық ғылым академиясының Жер, Ғарыш және Коммуникациялар туралы ғылымдар орталығы жанынан құрылған «Көлік» ғылымы секциясының көшпелі отырысы өтті. Көшпелі отырыс Алматы метросының құрылыс алаңында және «Метропроект» жауапкершілігі шектеулі серіктестігінің ғимаратында ұйымдастырылды. Іс-шараға Мұхамеджан Тынышпаев атындағы ALT университетінің ректоры Жармағамбетова Меруерт Советовқызы бастаған профессор-оқытушылар құрамы, Қазақстан Республикасы Президентінің жанындағы Ұлттық ғылым академиясының Көлік ғылымдары және технологиялары институтының басшылығы мен қызметкерлері, салалық мамандар, ғалымдар және инженерлер қатысты.

Метро құрылысы барысымен танысу

Кездесу барысында қатысушылар метро құрылысының шахтасына түсіп, жерасты көлік инфрақұрылымының құрылыс барысымен, қолданылып жатқан заманауи инженерлік-технологиялық шешімдермен және қауіпсіздік талаптарымен тікелей танысты. Аталған нысан бойынша таныстырылымды «Көлік ғылымы» секциясының мүшесі, «Bazis Construction» компаниясының метро станциясы бойынша жоба жетекшісі Өкшебаев Мұрат Таңқыбайұлы жүргізді.

Алматы метросын дамыту жоспарлары

Отырыстың келесі бөлімінде «Метропроект» ЖШС директоры Көлбаев Мұратбек Нағыметұлы Алматы метросын дамытудың алдағы жоспарлары, жаңа желілердің құрылысы, жобалау және іске асыру кезеңдері, сондай-ақ жерасты көлік инфрақұрылымын кеңейтуге бағытталған стратегиялық даму бағыттары бойынша мазмұнды презентация жасады. Презентация барысында метро саласында қолданылатын заманауи инженерлік шешімдер мен ұзақ мерзімді даму перспективаларына ерекше назар аударылды.

Болашақ жас мамандарды даярлау мәселелері

ALT университетінің ректоры Жармағамбетова Меруерт Советовқызы жерасты көлік инфрақұрылымы саласы үшін болашақ жас мамандарды даярлау бағыты бойынша арнайы презентация ұсынды. Онда білім беру бағдарламаларын нақты өндірістік жобалармен ұштастыру, студенттерді ерте кезеңнен бастап құрылыс алаңдары мен жобалау ұйымдарына тарту, сондай-ақ ғылым–білім–өндіріс арасындағы өзара байланысты күшейту мәселелері кеңінен қарастырылды.

Ғылыми қолдау және стратегиялық міндеттер

«Көлік» ғылымы секциясының төрағасы, академик Бағдат Бұрханбайұлы Телтаев метро құрылысы барысында туындайтын өзекті инженерлік, технологиялық және ұйымдастырушылық мәселелерді жетекші ғалымдардың қатысуымен жүйелі түрде зерделеудің маңыздылығын атап өтті. Сонымен қатар, нақты ғылыми шешімдер әзірлеу, білікті инженерлік кадрларды даярлау және аталған бағыттағы ғылыми-зерттеу жұмыстарын мега-гранттық жобалар аясында қаржыландыру жоспарланып отырғаны айтылды.

Алматы қаласы үшін метрополитеннің маңызы

Алматы қаласы үшін метро – қалалық көлік жүйесін дамытудың ең тиімді әрі экологиялық қауіпсіз тетіктерінің бірі. Метро желілерінің кезең-кезеңімен кеңеюі:

қала көшелеріндегі көлік жүктемесін азайтуға,

жол кептелістерін төмендетуге,

тұрғындардың уақытын үнемдеуге,

қоғамдық көлікке деген сенімді арттыруға,

атмосфераға таралатын зиянды қалдықтарды азайту арқылы экологиялық жағдайды жақсартуға мүмкіндік береді.

Қорытынды

Көшпелі отырыс қорытындысы бойынша метро құрылысы – ғылым, білім және инженерияның үйлесімді нәтижесі екендігі атап өтілді. Алматы метросының дамуы қаланың әлеуметтік-экономикалық өсіміне, көлік инфрақұрылымының жаңаруына және болашақ кәсіби мамандарды даярлауға елеулі үлес қосатыны айқындалды.

Жаңалықтар

АЛМАТЫ МЕТРОСЫ – ҚАЛА ӨМІРІНІҢ САПАСЫН АРТТЫРАТЫН СТРАТЕГИЯЛЫҚ ЖОБА