Бүгін Алматы қаласындағы Ғылым ордасында Халықаралық әйелдер күні қарсаңында Қазақстан Республикасы Президентінің жанындағы Ұлттық ғылым академиясы академик Нәйлә Оразғұлқызы Базанова атындағы марапатты салтанатты түрде табыстау рәсімін өткізді.

Іс-шараға отандық ғылымның дамуына үлес қосып жүрген жетекші әйел-ғалымдар, ғылыми қызметкерлер, жоғары оқу орындарының оқытушылары мен ғылыми ұйымдардың басшылары қатысты.

Академик Н.Базанова атындағы марапат ғылымның дамуына елеулі үлес қосқан, жоғары ғылыми жетістіктерге қол жеткізген әйел-ғалымдарды қолдау және олардың еңбегін дәріптеу мақсатында тағайындалған.

Бұл бастама отандық ғылымдағы әйелдердің жетістігін мойындауға және жас зерттеушілерді ғылымға ынталандыруға бағытталған.
Шара барысында Қазақстан Республикасы Ұлттық ғылым академиясының президенті барша әйелдерді Халықаралық әйелдер күнімен құттықтады.

Ол «Жаңа Қазақстан» құру жолында әйелдердің, әсіресе ғылым саласында еңбек етіп жүрген нәзік жандардың орны ерекше екенін атап өтіп, баршаға зор денсаулық, отбасыларына амандық, ал жүздеріне әрдайым көктемнің күніндей шуақ тіледі.

https://kazgazeta.kz/news/167115

Жаңалықтар

Алматыда әйел-ғалымдарға арналған академик Н.Базанова атындағы марапат табысталды