Ғылым күні қарсаңында ҚР Президентінің жанындағы Қазақстан Республикасының Ұлттық ғылым академиясы мен әл-Фараби атындағы Қазақстан ұлттық университеті отандық жоғары білім беру тарихындағы жаңа белесті ашты. Алғаш рет 2026 жылдың 30 наурызы мен 3 сәуірі аралығында Академияның толық мүшелері – академиктері, еліміздің жетекші ғалымдары университет оқытушылары, жас ғалымдар, докторанттар мен студенттер үшін ашық дәрістер циклін өткізуде.

Жаңартылған Ұлттық ғылым академиясының бастамасымен қолға алынған бұл формат академиктердің бірегей тәжірибесін жас буынға тікелей беруді және іргелі ғылым мен университет қоғамдастығы арасында «алтын көпір» орнатуды көздейді.

2026 жылғы 31 наурызда ашық дәріспен көрнекті ғалым, ҚР ҰҒА академигі, «Persona» халықаралық репродуктология клиникалық орталығының басшысы Вячеслав Нотанович Локшин сөз сөйледі. «Репродуктивті медицинаның қазіргі мүмкіндіктері» тақырыбындағы іс-шараны Басқарма мүшесі – ғылыми-инновациялық қызмет жөніндегі проректор Марғұлан Ибраимов ашып, академик Локшиннің отандық денсаулық сақтау жүйесінің қалыптасуы мен дамуына қосқан елеулі үлесін, сондай-ақ жаңа ғылыми бағыттардың негізін қалаудағы рөлін атап өтті.

Академик Вячеслав Локшин – «Құрмет» және I дәрежелі «Барыс» ордендерінің иегері, Қазақстан Республикасы Президентінің жанындағы Ғылым және технологиялар жөніндегі ұлттық кеңестің мүшесі, 230-дан астам ғылыми еңбектің авторы және 30-дан астам ғылым докторларының ғылыми жетекшісі. Оның ғылыми және практикалық қызметі қосалқы репродуктивті технологияларды дамытуға, сондай-ақ онкологиялық науқастардың репродуктивтік әлеуетін сақтауға бағытталған медицинаның жаңа бағыты – онкофертильділікті қалыптастыруға негізделген.

Дәріс барысында академик репродуктивті медицинаның қазіргі жағдайы мен даму перспективаларына кешенді талдау жасап, бұл саланың сапалық тұрғыдан жаңа деңгейге көтерілгенін және демографиялық саясатты жүзеге асыруда маңызды рөл атқаратынын атап өтті. Сонымен қатар «Аңсаған сәби» мемлекеттік бағдарламасына ерекше назар аударылып, оның аясында экстракорпоральды ұрықтандыру рәсімдеріне қолжетімділіктің айтарлықтай артқаны айтылды.

Баяндаманың негізгі тезистері:

• Репродуктивті медицина мемлекеттің демографиялық саясатын іске асырудың маңызды құралына айналуда;

• ЭКҰ бағдарламаларын кеңейту туу көрсеткішінің артуына және медициналық көмектің қолжетімділігінің жақсаруына ықпал етеді;

• Халықаралық ұйымдардың деректеріне сәйкес, бедеулік мәселесі өзектілігін сақтап отыр: әрбір алтыншы неке осы мәселемен бетпе-бет келеді, бұл жүйелі ғылыми және медициналық шешімдерді талап етеді;

• Онкофертильділікті дамыту қазіргі медицинаның ең гуманистік бағыттарының бірі ретінде қарастырылады.

«Бүгінде репродуктивті медицина – бұл тек емдеу ғана емес, сонымен қатар адамға толыққанды өмір сүруге мүмкіндік беру», – деп атап өтті академик.

Кездесу соңында жас ғалымдар, докторанттар мен студенттердің қатысуымен белсенді пікір алмасу өтті. Онда медициналық ғылымды дамыту және инновациялық технологияларды практикалық денсаулық сақтауға енгізу мәселелері талқыланды. Вячеслав Нотанович ғылымдағы табыс үздіксіз ізденіс, жоғары жауапкершілік және білімді тәжірибеге енгізуге ұмтылу арқылы қалыптасатынын атап өтіп, жас әріптестеріне құнды кеңестерін берді.

Ғылым апталығы аясындағы дәрістер циклі Қазақстан Республикасы Президентінің жанындағы Ұлттық ғылым академиясының басқа да академиктерінің баяндамаларымен жалғасып, заманауи ғылым мен технологиялардың негізгі бағыттарын қамтитын болады.

Жаңалықтар

АКАДЕМИК ЛОКШИН ВЯЧЕСЛАВ НОТАНОВИЧ ЖАС ҒАЛЫМДАРҒА «РЕПРОДУКТИВТІ МЕДИЦИНАНЫҢ ҚАЗІРГІ МҮМКІНДІКТЕРІ» ТАҚЫРЫБЫНДА ДӘРІС ОҚЫДЫ