2026 жылдың 12 мамырында Ұлттық ғылым академиясының 80 жылдығына орай Қазақстан Республикасы Президентінің жанындағы Ұлттық ғылым академиясы Кіші ғылым академиясы қоғамдық қорымен бірлесіп «ҚАЗІРГІ ЗАМАНҒЫ ҒЫЛЫМ ЖӘНЕ ЖАСТАР: ҰРПАҚТАР ДИАЛОГЫ» атты 50-ші Республикалық ғылыми-практикалық конференциясын өткізді.

Аталған конференцияның негізгі мақсаты – дарынды жастарды анықтау, олардың ғылыми әлеуетін дамыту және «Мектеп – ЖОО – ҒЗИ» жүйесі негізінде болашақ ғылыми кадрлар резервін қалыптастыру. Жарты ғасырлық тарихы бар ғылыми алаң жас зерттеушілердің ғылымға деген қызығушылығын арттырып, олардың ғылыми ізденістерін қолдауға бағытталды.

Конференция жұмысына еліміздің Астана, Қарағанды, Алматы қалалары мен Алматы облысынан келген жас зерттеушілер мен оқушылар қатысты. Іс-шара аясында жалпы саны 143 қатысушының 120 ғылыми баяндамасы ұсынылып, 22 секциялық отырыс ұйымдастырылды.

Секциялық отырыстар физика-математика, информатика, робототехника, ғарыш ғылымы, химия-биология, биотехнология, экология, тарих, өлкетану, археология, экономика, география, туризм, филология, қазақ тілі мен әдебиеті, орыс тілі мен әдебиеті, ағылшын тілі мен әдебиеті бағыттары бойынша өтті.

Аталған ғылыми бағыттар бойынша секциялық конференциялар Академия қабырғасында және А.Б. Бектұров атындағы Химия ғылымдары институтында, М.О. Әуезов атындағы Әдебиет және өнер институтында, Математика және модельдеу институтында, сондай-ақ Ш. Уәлиханов атындағы Тарих және этнология институтында ұйымдастырылды.

Қатысушылар заманауи ғылыми мәселелер мен зерттеу нәтижелеріне негізделген баяндамаларын ұсынып, ғылыми пікірталас жүргізіп, тәжірибе алмасты. Жас зерттеушілердің ғылыми жобалары мен баяндамаларын профессорлар, ғылым докторлары және еліміздің жетекші ғалымдары бағалады. Сарапшылар қатысушылардың ғылыми ізденістеріне жоғары баға беріп, зерттеу жұмыстарының өзектілігі мен практикалық маңызын ерекше атап өтті.

Конференция қорытындысы бойынша үздік деп танылған қатысушылар Қазақстан Республикасының Ұлттық ғылым академиясы тарапынан І, ІІ, ІІІ дәрежелі дипломдармен және сертификаттармен марапатталды.

Аталған конференция жас зерттеушілердің ғылыми ізденіс көкжиегін кеңейтіп, олардың зияткерлік әлеуетін шыңдауға, ғылым мен білім сабақтастығын тереңдетуге әрі келешек ғылыми буынды қалыптастыруға қызмет ететін тағылымды республикалық алаң ретіндегі маңызын тағы бір мәрте айқын танытты.

Жаңалықтар

«ҚАЗІРГІ ЗАМАНҒЫ ҒЫЛЫМ ЖӘНЕ ЖАСТАР: ҰРПАҚТАР ДИАЛОГЫ» 50-ШІ РЕСПУБЛИКАЛЫҚ ҒЫЛЫМИ-ПРАКТИКАЛЫҚ КОНФЕРЕНЦИЯСЫ ӨТТІ