2026 жылдың 15 мамырында Қазақстан Республикасы Президентінің жанындағы Қазақстан Республикасының Ұлттық ғылым академиясы және Ахмет Байтұрсынұлы атындағы Тіл білімі институты білесе көрнекті ғалым, академик Өмірзақ Айтбайұлының 90 жылдығына арналған «Қазақ тілі ұлттық терминқорын стандарттау және цифрландыру мәселелері» халықаралық ғылыми конференциясын өткізді.

Конференцияға еліміздің және шетелдің белгілі ғалымдары, тілтанушылар, терминтанушылар, жоғары оқу орындарының профессор-оқытушылары, жас зерттеушілер қатысты.

Конференцияның ашылуында ҚР Президентінің жанындағы Ұлттық ғылым академиясының Басқарма Президенті А.Күрішбаевтың қүттықтауын Білім және қоғамды дамыту орталығының басшысы Жеңісбек Төлен оқыса, Халықаралық «Қазақ тілі» қоғамының президенті Рауан Кенжеханұлының және ҚР Ғылым және жоғары білім министрлігі Тіл саясаты комитетінің төрағасы Ербол Тілешовтің, Халықаралық қазақ-түрік университетінің вице-президенті, профессор Құлбек Ергөбектің арнайы құттықтау хаттары мен лебіздері таныстырылды.

Жиын барысында академик Өмірзақ Айтбайұлының өмірі мен ғылыми қызметіне арналған арнайы бейнебаян көрсетіліп, ғалымның терминология, тіл мәдениеті және ұлттық руханият саласындағы бай мұрасы туралы баяндамалар оқылды.

Атап айтсақ, ҚР Президентінің жанындағы Ұлттық ғылым академиясының құрметті академиктері Кәрімбек Құрманәлиев «Академик Ө. Айтбайұлы: терминология және руханият мәселелері», Ерден Қажыбек «Цифрлық дәуірдегі тілдік қауіпсіздік мәселесі», Өзбекстаннан келген профессор Хамидулла Дадабаев «Түркі тілдері терминдерін стандарттаудың ғылыми-практикалық негіздері», Шерубай Құрманбайұлы «Қазақ терминологиясын цифрландырудың ғылыми негізі, әдістері мен бағыттары» тақырыптарында мазмұнды баяндамалар жасады.

Баяндамаларда ұлттық терминқорды жүйелеу, біріздендіру, стандарттау және оны цифрлық ортаға бейімдеу мәселелері кеңінен талқыланды.

Конференция түстен кейін терминология, мемлекеттік тіл, тіл саясаты және заманауи лингвистикалық бағыттарға арналған секциялық отырыстармен өз жалғасын тапты. Секциялар барысында қазақ терминологиясын дамыту, цифрлық технологиялар мен жасанды интеллекттің тіл біліміндегі мүмкіндіктері кеңінен талқыланды.

Жаңалықтар

ӨМІРЗАҚ АЙТБАЙҰЛЫНЫҢ 90 ЖЫЛДЫҒЫНА АРНАЛҒАН КОНФЕРЕНЦИЯ ӨТТІ