2025 жылғы 13 тамызда ҚР Президентінің жанындағы Ұлттық ғылым академиясы Білім және қоғамды дамыту ғылымдар орталығы өкілдері мен ҚР Ғылым және жоғары білім министрлігі Ғылым комитетінің Философия, саясаттану және дінтану институты ұжымының қатысуымен жұмыс кездесуі өтті.

Кездесу барысында институт делегациясына Академияның құрылымы, негізгі қызмет бағыттары және жүзеге асырылып жатқан жобалар таныстырылды. Тараптар әлеуметтік-гуманитарлық ғылымдардың дамуындағы өзекті мәселелерді талқылап, бірқатар бастамалар бойынша пікір алмасты.

Атап айтқанда, әлеуметтік-гуманитарлық ғылымдар саласындағы басым бағыттарды айқындау және олардың болашақтағы дамуын болжауға арналған форсайт-зерттеулерге қатысу туралы ұсыныстар көтерілді. Сондай-ақ нысаналы-бағдарламалық қаржыландыру, мегранттар және ғылыми-техникалық жобалар аясында зерттеу тақырыптарын ұсыну мүмкіндіктері қаралды. Сонымен бірге осы салада нақты зерттеу бағыты бойынша сараптамалық (аналитикалық) жазбалар әзірлеудің маңыздылығы атап өтілді.

Қазіргі қоғамдық-саяси өзгерістер жағдайында ұлттық бірегейлікті қалыптастырудың ерекшеліктеріне қатысты ұсыныстарды ҚР Президентінің жанындағы Ұлттық құрылтайға ұсыну мәселесі талқыланды. Бұдан бөлек, Президент жанындағы Ғылым және технологиялар жөніндегі Ұлттық кеңеске ұсыныстар әзірлеу мәселелері қарастырылды.

Кездесу қорытындысында тараптар ғылыми ынтымақтастықты нығайтуға, әлеуметтік-гуманитарлық ғылымдардың дамуына үлес қосуға және елдің ғылыми әлеуетін арттыруға бағытталған бірлескен жобаларды іске асыруға дайын екендіктерін білдірді.

Жаңалықтар

Академия мен Ғылыми зерттеу институттары арасында өзара іс-қимылды кеңейту мақсатында жұмыс кездесуі өтті