Алматы, Қазақстан — 2025 жылдың 4–5 қыркүйегі Қазақстан Республикасы Президенті жанындағы Ұлттық ғылым академиясының қолдауымен Қазақстан онкологтар қауымдастығы және С.Ж. Асфендияров атындағы Қазақ ұлттық медицина университеті халықаралық онкологтар саммитін – «Best of ASCO Kazakhstan-2025» өткізді.

Best of ASCO — бұл Америкалық клиникалық онкология қоғамының (ASCO) жаһандық бастамасы. Оның аясында әлемнің жетекші елдеріне АҚШ-та жыл сайын өтетін ASCO конференциясында ұсынылған ең үздік баяндамалар мен жетістіктерді тарату құқығы беріледі. Қазақстан осы беделді халықаралық қауымдастыққа 2023 жылы қосылып, биыл үшінші рет дүниежүзінің жетекші мамандарын қабылдап отыр.

Өз құттықтау сөзінде ҚР Президенті жанындағы ҰҒА президенті Ақылбек Күрішбаев қатерлі ісік қазіргі медицина мен қоғамның ең өзекті мәселелерінің бірі екенін атап өтті. Жыл сайын бұл дерт әлем бойынша шамамен 9,7 миллион адамның өмірін қияды. Бұл онкологиялық ауруларды диагностикалау мен емдеуді жетілдіруде бірлескен жұмыстың маңыздылығын айқын көрсетеді.

Саммит бағдарламасы қазіргі онкологияның негізгі бағыттарын қамтыды:

• өкпе, асқазан, өңеш, сүт безі, репродуктивтік және несеп-жыныс жүйесі, бас және мойын қатерлі ісіктері бойынша жаңа зерттеулер;

• гематологиялық ауруларды емдеудің заманауи тәсілдері;

• иммунотерапия мен нысаналы терапиядағы инновациялар;

• күрделі клиникалық жағдайларды талдау және тәжірибе алмасу.

Саммит жұмысына 500-ден астам маман – онкологтар, радиотерапевттер, химиотерапевттер, маммологтар, хирургтар, патоморфологтар, диагностик мамандар және басқа да сарапшылар қатысты. Қатысушылар қатарында Қазақстаннан бөлек, АҚШ, Испания, Түркия, Үндістан, БАӘ, Израиль, Грузия, Ресей, Қырғызстан, Өзбекстан, Моңғолиядан келген ғалымдар мен практиктер болды. Қазақстан алғаш рет әлемдік деңгейдегі сарапшыларды қабылдады, олардың қатарында София Микельсон (АҚШ), Даг Пайл (АҚШ), Фелипе Куньяго (Испания) және басқалар бар.

ҚР Президенті жанындағы ҰҒА академигі Диляра Қайдарова саммиттің Алматыда өтуін ерекше мәнге ие деп атады: мұнда ғылым, кәсібилік және медициналық қауымдастықтың бірлігі тоғысып, онкологиялық қызметті дамытуға берік негіз қаланады. «Best of ASCO Kazakhstan-2025» шеңберінде жетекші сарапшылардың қатысуы медициналық көмектің сапасын арттыруға және қатерлі ісікке қарсы жаһандық күрестегі ортақ мақсаттарға қол жеткізуге маңызды қадам болып саналады.

МАГАТЭ Бас директордың орынбасары Наджат Мохтардың «Ядролық медицина – заманауи онкологияның ажырамас бөлігі: диагностикалаудан қолжетімді емге дейін» атты баяндамасы ерекше қызығушылық тудырды.

«Best of ASCO Kazakhstan-2025» – бұл тек ғылыми конференция емес. Бұл жаңа идеялар туындайтын, кәсіби альянстар құрылатын және онкологиялық көмекке озық тәжірибелерді енгізуге жол ашатын халықаралық алаң.

Саммит жұмысының қорытындысында МАГАТЭ мен ҚР Президенті жанындағы Ұлттық ғылым академиясы арасында атом энергетикасы, ядролық физика, ауыл шаруашылығы, медицина, су ресурстары және кадр даярлау салаларында бірлескен ғылыми зерттеулер жүргізу туралы меморандумға қол қою жөнінде келісімге қол жеткізілді.

Жаңалықтар

Халықаралық онкологтар саммиті «Best of ASCO Kazakhstan-2025»