2025 жылдың 12 қыркүйегінде Қазақстан Республикасы Президентінің жанындағы Қазақстан Республикасының Ұлттық ғылым академиясы Түркі Академиясымен бірлесіп қазақ халқының ұлы ойшылы, ақын Абай Құнанбайұлының 180 жылдығына арналған «Данышпан ақын Абай мұрасы және түркі әлеміндегі рухани сабақтастық» атты халықаралық конференция өткізді. Бұл алқалы жиын түркі дүниесі ғалымдарының басын қосып, Абай мұрасының әлемдік деңгейдегі маңызын айқындаған айтулы оқиға болды.

Іс-шараға ҚР Ұлттық ғылым академиясының президенті Ақылбек Күрішбаев, Түркі Академиясының президенті Шаһин Мұстафаев, сондай-ақ дипломатиялық миссия өкілдері, түркі елдерінің консулдықтары, әдебиет пен тіл саласының жетекші ғалымдары, абайтанушылар, мемлекет және қоғам қайраткерлері қатысты. Конференция барысында қатысушылар Абай шығармашылығының түркі халықтарын жақындастырудағы рөлі мен оның мұрасының қазіргі заман үшін өзектілігін талқылады.

Академия президенті Ақылбек Күрішбаев Абайдың мұрасы – күллі адамзатқа ортақ қазына екендігін, әсіресе түркі халықтарының рухани сабақтастығы мен мәдени тұтастығын нығайтуда Абайдың мұрасының алар орны айрықша екендігін атап өтті. Түркі Академиясының президенті Шаһин Мұстафаев: “Абай мұрасы тек қазақ халқының ғана емес, бүкіл түркі өркениетіне ортақ құндылық екенін атап өтіп, Түркі Академиясының жаңа басылымдары ұлы ойшылға деген құрметпен қатар, түркі әлеміндегі мәдени бірлік пен сабақтастықты нығайтуға бағытталған маңызды қадам” деді.

Шарада Әл-Фараби атындағы ҚазҰУ «Абайтану орталығы» директоры, филология ғылымдарының докторы, профессор Жанғара Дәдебаев, А.Байтұрсынұлы атындағы Тіл білімі институтының директоры, филология ғылымдарының кандидаты Анар Фазылжанова, Әл-Фараби атындағы ҚазҰУ профессоры, филология ғылымдарының докторы Қансейіт Әбдезұлы, Құрманғазы атындағы Қазақ ұлттық консерваториясының аға оқытушысы, Қазақстанның еңбек сіңірген қайраткері Еркін Шүкіман, филология ғылымдарының докторы, профессор Ислам Жеменей, Түркі Академиясының сарапшысы, филология ғылымдарының кандидаты Ақеділ Тойшанұлы баяндама жасады.

Жиын аясында Түркі Академиясының арнайы әзірлеген құнды басылымдарының тұсаукесері өтті. Атап айтқанда, М. Әуезовтің «Абай» романының әзербайжан тіліндегі аудармасы, Абай Құнанбайұлының ортақ түркі әліпбиінде жарық көрген «Қара сөздері» және Қайым Мұхамедхановтың «Абайдың мұрагерлері» еңбегінің түрік тіліндегі нұсқасы таныстырылды. Бұл еңбектер ұлы ақынның бай рухани мұрасын кеңінен насихаттап, түркі халықтарының мәдени-рухани байланысын одан әрі тереңдетуге бағытталды.

Халықаралық конференция қазақ әдебиетінің асқар шыңы – Абай мұрасын ұлықтап қана қоймай, түркі әлеміндегі ғылыми және мәдени ынтымақтастықты нығайтуға жаңа серпін берді.

Жаңалықтар

Абай мұрасы және Түркі әлемі: халықаралық ғылыми конференциясы өтті