2025 жылғы 18 маусым, Алматы — Алматы қаласы Сингапурдан келген ғылым мен STEM-білім беру саласындағы жетекші сарапшыларды қабылдады. «Ғылым ордасы» ғимаратында Сингапур Ұлттық ғылым академиясы мен Сингапур Ғылым орталығы делегациясының ҚР Президентінің жанындағы Ұлттық ғылым академиясы басшылығымен ресми кездесуі өтті. Іс-шара елімізде халықаралық деңгейдегі алғашқы Балалар ғылыми музейін құру жобасы аясында ұйымдастырылды.
Кездесудің басты қонағы – Сингапур Ұлттық ғылым академиясының Президенті, Science Centre Singapore Бас директоры, доктор Тит Менг Лим болды. Ол Азиядағы ғылыми білім мен STEM-бағдарламаларын дамытуға 20 жылдан астам уақыт бойы үлес қосып келеді. Делегация құрамында доктор Ли Сон Чун мен Дэниел Тан мырза болды.
Қазақстан тарапынан ҰҒА вице-президенттері Асқар Серкұлұлы Жұмаділдаев, Абай Серікқанұлы Серікқанов және ғылыми орталықтардың басшылары қатысты. Тараптар бірлескен ғылыми жобалар, академиялық алмасу, жас ғалымдарды даярлау мен ғылыми-ағартушылық модель құруды талқылады.
STEM-білім беру, ғылыми коммуникация және ағартушылық бағыттарындағы жобалар, сондай-ақ Балалар ғылыми музейін құру бастамасы басты назарда болды. Бұл Президент пен Үкімет қолдауымен іске асып жатқан жоба.
Сингапур тарапы ғылыми орталықтарды басқару, мұғалім даярлау және жастар арасында ғылымды насихаттау саласындағы тәжірибесімен бөлісті. Жоба аясында музейге Сингапур Ғылым орталығының зияткерлік меншігі мен шешімдерін қолдануға лицензиялық құқықтар беріледі.
Кездесу нәтижесінде Балалар ғылыми музейімен әріптестік орнату, бірлескен Ғылыми кеңес құру және мазмұнды Қазақстанның ерекшеліктеріне бейімдеу келісілді.
