2026 жылдың 12 мамырында Ұлттық ғылым академиясының 80 жылдығына орай Қазақстан Ұлттық ғылым академиясының негізін қалаушы, көрнекті ғалым Қаныш Сәтбаев мұрасын насихаттауға арналған «Жас Қаныш» республикалық оқушылар сайысы жоғары деңгейде өтті.

Шара Қазақстан Республикасы Президентінің жанындағы Ұлттық Ғылым Академиясы, «Отбасы хрестоматиясы» қоғамдық қоры ұйымдастыруымен және Халықаралық Сәтбаев қорының қолдауымен өткізілді.

Шараның мақсаты – жас буынның ғылымға қызығушылығын арттыру, ғылыми ойлау мәдениетін қалыптастыру және дарынды оқушыларды қолдау.

Сайысқа республикамыздың 15-ке жуық облысы мен қаласынан іріктелген 37 белсенді оқушы қатысты. Қатысушылар академик Қаныш Сәтбаевтың өмірі мен ғылыми қызметіне арналған «Қаныш және ғылыми майдан», «Жас Қаныш», «Қаныштың жастық шағы» кітаптары негізінде білімдерін сынады.

Байқау екі кезең бойынша ұйымдастырылды. Алғашқы кезеңде қатысушылар тест, эссе және билет сұрақтары арқылы сынға түсіп, нәтижесінде үздік 10 финалист анықталды. Ал екінші кезеңде финалистер аналитикалық және философиялық бағыттағы күрделі сұрақтарға жауап беріп, өздерінің танымдық деңгейі мен ойлау қабілетін көрсетті.

Сайысқа белгілі ғалымдар, ағартушылар мен қоғам қайраткерлері қазылық етті. Атап айтқанда, қазылар алқасының құрамында «Отбасы хрестоматиясы» ҚҚ негізін қалаушы, ағартушы Санжар Керімбай, «Қаныш және ғылыми майданы» кітабының авторы, жазушы Әділбек Нәби, Сәтбаевтанушы, Қазақстан Жазушылар одағының мүшесі Аспандияр Әденұлы, ҚР Президентінің жанындағы Ұлттық ғылым академиясы Білім және қоғамды дамыту ғылымдар орталығының басшысы Жеңісбек Төлен және AljabrA & OrtaXR жобаларының жетекшісі Садық Шерімбек болды.

Сайыс қорытындысы бойынша Алматы облысынан қатысқан Мұхаметжан Ардақ І орынды иеленіп, 300 мың теңге қаржылай сыйлықпен марапатталды. Сонымен қатар оған Qalan платформасының 250 мың теңгелік математика және ағылшын курстарына 12 айлық жазылым мен «Әл-жәбрдің атасы» журналына бір жылдық жазылым табысталды.

ІІ орынды Орал қаласының оқушысы Құттымұрат Низамаддин иеленіп, 200 мың теңге қаржылай сыйлық және Qalan платформасының 200 мың теңгелік математика және ағылшын курстарына 9 айлық жазылым мен «Әл-жәбрдің атасы» журналына 9 айлық жазылым табысталды.

ІІІ орын Астана қаласынан қатысқан Мұратбек Сабинаға бұйырып, 100 мың теңге қаржылай сыйлық пен Qalan платформасының 150 мың теңгелік математика және ағылшын курстарына 6 айлық жазылым мен «Әл-жәбрдің атасы» журналына 6 айлық жазылымға ие болды.

Жеңімпаздарға қаржылай сыйлықтар мен қоса арнайы сертификаттар, сондай-ақ Ұлттық ғылым академиясы президентінің атынан диплом табысталды.

Финалға жолдама алған 7 оқушыға 50 мың теңгеден арнайы сыйақы берілді. Сонымен қатар Jana Bala компаниясы тарапынан қатысушыларға арнайы сыйлықтар ұсынылды. Барлық қатысушыларға Қазақстан Республикасының Президентінің жанындағы Ұлттық ғылым академиясы президентінің атынан алғыс хаттар мен марапаттар табысталып, «Отбасы хрестоматиясы» қоғамдық қоры атынан құны 30 мың теңге болатын «Құндылықтар қалтасы» кітаптар жинағы сыйға берілді.

Іс-шара барысында Қаныш Сәтбаевтың балалық шағы, ғылым жолы және қазақ ғылымының дамуына қосқан тарихи үлесі туралы арнайы бейнероликтер көрсетіліп, ғалым өмірінен естеліктер оқылды. Сонымен бірге дәстүрлі әндер орындалып, жыр-шашулар ұйымдастырылып, рухани-мәдени мазмұндағы әсерлі кешке ұласты.

Аталған сайыс жас зерттеушілердің ғылыми әлеуетін арттыруға, ұлттық ғылым тарихын дәріптеуге және болашақ ғылыми буынды қалыптастыруға бағытталған маңызды республикалық алаң ретінде өз маңызын тағы бір мәрте айқындады.

Жаңалықтар

«Жас Қаныш» республикалық оқушылар сайысы өтті