Қазақстан Республикасы Президентінің жанындағы Қазақстан Республикасының Ұлттық ғылым академиясы ұжымы атынан және өз атымнан көрнекті жазушы, драматург, Қазақстанның Еңбек Ері, мемлекеттік сыйлықтың лауреаты, қазақ елінің маңдайына біткен бірегей тұлға Дулат Исабековтың қайтыс болуына байланысты отбасына, туған-туыстарына және жақындарына қайғырып көңіл айтамын!
Жазушының туындылары терең философиялық ойларымен, шынайылығымен және ұлттық болмысты бейнелеуімен ерекшеленген. Дулат ағамыздың шығармалары ұлттық руханияттың ажырамас бөлігіне айналып, қазақ әдебиетінің алтын қорына енді. Онда адам жанының терең қатпарларын ашып, олардың ішкі сезімдерін, жан толғаныстарын ерекше суреттеген.
Дулат Исабековтің кейіпкерлері – өз дәуірінің шынайы бейнесі, олардың тағдырлары оқырмандарға жақын әрі түсінікті. Сонымен қатар, оның пьесалары шетелдік театр сахналарында да қойылып, қазақ драматургиясын әлемдік деңгейде танытты.
Жазушының туындылары тек әдеби құндылықтарымен ғана емес, қоғамның өзекті мәселелерін көтеруімен де құнды. Ол өз шығармаларында адамгершілік, моральдық құндылықтар, заман мен адамның арақатынасы туралы терең ой қозғады.
Қазақстан Республикасы Президентінің жанындағы Ұлттық ғылым академиясы ғылым мен мәдениеттің өркендеуіне өлшеусіз үлес қосқан осындай көрнекті тұлғалардың еңбектерін құрметтеп, олардың шығармашылық мұрасын өскелең ұрпаққа барынша насихаттауды негізгі міндеттердің бірі деп санайды.
Соңына өшпес әдеби мол мұра қалдырған Дулат Исабекұлының жарқын бейнесі, азаматтық ұстанымы мен ардақты есімі халқымыздың жүрегінде мәңгі сақталады. Марқұмның иманы саламат, жаны жәннатта болсын, рухы пейіште шалқысын, Алла алдынан жарылқасын!
Академия Президенті А. Күрішбаев
22.02.2025 ж.
