Ғылым ордасында Халықаралық әйелдер күні қарсаңында Президент жанындағы Ұлттық ғылым академиясы алғаш рет ғалым әйелдерге арналған академик Н.Базанова атындағы марапат табыс етілді, деп хабарлайды Egemen.kz.
Академик Найля Оразғұлқызы Базанова – Қазақстан мен Орталық Азиядағы тұңғыш әйел-академик, көрнекті физиолог, қоғам қайраткері. Ол қазақ әйелдері арасынан шыққан тұңғыш биология ғылымының докторы, профессор, Қазақ КСР ғылым академиясының академигі, Қазақстанның еңбек сіңірген ғылым қайраткері.
ҰҒА Президенті, академик Ақылбек Күрішбаев ғалым аруларды 8 наурыз халықаралық әйелдер мерекесімен құттықтап, еліміздегі ғылымды дамытудың маңызын атап өтті.
Айтулы шараға ғылымды дамытуға айрықша үлес қосып жүрген 400-ге жуық жетекші әйел-ғалымдар, ғылыми қызметкерлер, оқытушылар мен жоғары оқу орындарының, ғылыми ұйымдардың басшылары қатысып, әйел-ғалымдарға арналған академик Н.Базанова атындағы марапат отандық ғылымның дамуына айрықша үлес қосып, ғылымның әртүрлі бағыттарында үздік нәтиже көрсетіп жүрген 48 ғалымға табыс етілді. Марапатқа лайықты үміткерлер университеттер мен ғылыми-зерттеу институттары ұжымдарының ұсыныстары бойынша анықталды.
Толық ақпарат: https://egemen.kz/article/383143-ghalym-ayelderge-naylya-bazanova-atyndaghy-marapat-tabystaldy
Egemen Qazaqstan
06 наурыз 2025 жыл
Эльвира СЕРІКҚЫЗЫ