2024 жылғы 12 қарашада Қазақстан Республикасы Президентінің жанындағы Ұлттық ғылым академиясының Жер, Ғарыш және коммуникациялар туралы ғылым орталығының «Ұлттық қауіпсіздік» бағытындағы жұмыс секциясының отырысы өтті. Бұл жиында еліміздің ұлттық қауіпсіздік саласына қатысты маңызды мәселелер талқыланып, заман талабына сай жаңа міндеттер мен бастамалар қарастырылды.
Отырыс барысында Қазақстанның ұлттық мүддесі мен тәуелсіздігін қорғауға бағытталған стратегиялық шешімдер қабылдау, аймақтық және халықаралық қауіп-қатерлерге дер кезінде жауап беру, және заманауи технологияларды ұлттық қауіпсіздік жүйесіне енгізу мәселелері көтерілді. Сонымен қатар, қауіпсіздік саласында форсайттық зерттеулер әдісін қолдану талқыланды. Қатысушылар форсайттық зерттеулер арқылы қауіп-қатерлерді алдын ала болжау, дамудың ұзақ мерзімді стратегияларын әзірлеу және тұрақты даму мақсаттарына қол жеткізу жолдарын іздестірудің маңыздылығын атап өтті.
Жиында ғылыми зерттеулер мен жаңашыл идеялардың ұлттық қауіпсіздікті қамтамасыз етудегі рөлі мен маңызы ерекше назарға алынды. Форсайттық зерттеулердің өзектілігі мен тиімділігін ескере отырып, қатысушылар осы бағытта жүйелі жұмыстар жүргізуге келісті.
Кездесу қатысушылары арасында қауіпсіздік саласында жұмыс істейтін жетекші мамандар, зерттеушілер мен сарапшылар болды. Олар өз тәжірибелерімен бөлісіп, өзекті мәселелер бойынша пікір алмасты. Жиын соңында қауіпсіздік пен форсайттық зерттеулер бойынша бірлесіп жұмыс істеуге бағытталған нақты қадамдар айқындалып, алдағы жоспарлар белгіленді.
