ЖОШЫ ҰЛЫСЫН ЗЕРТТЕУШІ МАРИ ФАВЕРОНЫҢ КІТАБЫ ҚАЗАҚ ТІЛІНДЕ ЖАРЫҚ КӨРДІ
2026 жылдың 8 қыркүйегінде ҚР Президентінің жанындағы Ұлттық ғылым академиясында француз тарихшысы, Жошы Ұлысы мен ортағасырлық Еуразия тарихын зерттеуші Мари Фавероның «Алтын Орда. Дала империясы әлемді қалай өзгертті» кітабының қазақ тіліндегі нұсқасының ресми тұсаукесері өтті.
Іс-шара Ұлттық ғылым академиясының бастамасымен Steppe & World Publishing баспа үйі және Қазақстан Республикасындағы Франция Елшілігімен бірлесіп ұйымдастырылды.
Мари Фаверо өз еңбегінде Алтын Орданы тек әскери жаулап алулар тарихы тұрғысынан емес, Еуразияның саяси, экономикалық және мәдени кеңістігін қалыптастыруға ықпал еткен күрделі империялық жүйе ретінде қарастырады. Автор көшпелі қоғамдардың өзіндік басқару институттарына, қалалары мен ақша айналымына, халықаралық сауда мен дипломатияға, сондай-ақ Шығыс пен Батыс арасындағы мәдени байланыстарға ерекше назар аударады.
Ғалымның пайымдауынша, көшпелі империяларды әлемдік тарихтың шеткері құбылысы ретінде бағалау дұрыс емес. Алтын Орда Еуразия кеңістігін Шығыс–Батыс және Солтүстік–Оңтүстік бағыттарында байланыстырып, халықаралық сауда, дипломатиялық қатынастар, адамдар мен идеялар алмасуының дамуына елеулі ықпал етті. Оның саяси жүйесінің маңызды ерекшелігі – өзгермелі жағдайларға бейімделу, әскери, дипломатиялық және экономикалық тетіктерді икемді ұштастыра білуі.
Іс-шара барысында «Жошы Ұлысы – Алтын Орда – Қазақ хандығы» тарихи сабақтастығын нақты деректер мен заманауи пәнаралық әдістер негізінде зерттеудің маңызына ерекше назар аударылды. Қатысушылар Жошы Ұлысы мен Алтын Орданың әлемдік тарихтағы орны, көшпелі мемлекеттілік феномені және тарихи мұраны зерттеудің жаңа ғылыми тәсілдері жөнінде пікір алмасты.
Кітаптың қазақ тілінде жарық көруі – Алтын Орда тарихына қатысты әлемдік деңгейдегі заманауи зерттеулерді қазақстандық ғылыми және білім беру кеңістігіне енгізудегі маңызды қадам.
Ұлттық ғылым академиясы Жошы Ұлысының тарихи-мәдени мұрасын жүйелі зерттеуге, әлемдік ғылыми еңбектерді қазақ тіліне қолжетімді етуге және осы бағыттағы халықаралық ғылыми ынтымақтастықты дамытуға ерекше мән береді.
